अनुसूचित जाती, जमातीबद्दल तुच्छता दाखवत स्वतःच्या मेंरिटचा अहंकार बाळगणारे सवर्ण उच्चजातीचे आपल्या बघण्यात आले असतीलच. या मेरिटच्या मागे त्यांना अनुसूचित जाती, जमातीपेक्षा शेकडो वर्षे जे विशेषाधिकार मिळाले त्याकडे मात्र दुर्लक्ष केलं जातं. एखादा सवर्ण उच्चजातीय एखाद्या क्षेत्रात जर यशस्वी होत असेल तर त्या व्यक्तीला तिथे पोहचण्यासाठी जेवढे प्रयत्न, श्रम करावे लागले असतील तेच यश मिळविण्यासाठी अनुसूचित जाती, जमातीच्या व्यक्तीला सवर्ण व्यक्तिपेक्षा कित्येक पट जास्त प्रयत्न, श्रम करावे लागतात. सवर्णांना ज्या गोष्टी सहज उपलब्ध होतात त्या सहज गोष्टीसाठी सुद्धा अनुसूचित जाती, जमातीतील लोकांना अथक परिश्रम करावे लागतात.
ईथे एका व्यक्तिचं उदाहरण घेतलेलं आहे. आता हेच उदाहरण संपूर्ण समाजाला लावा. सवर्णांनी शेकडो वर्षे विशेषाधिकार, विशेष संधीचा उपभोग घेतला तर त्याच जागी अनुसूचीत जाती, जमातीच्या लोकांनी या सवर्णांकडून हालअपेष्टा सोसलेल्या दिसून येईल.
ह्या व्हिडिओत जगातले सर्वात श्रीमंत व्यक्ती बिल गेट्स यांनी जे यश मिळविलं त्याठिकाणी जर एखादा दूसरा व्यक्ती असता तर कदाचित तेवढा यशस्वी होऊ शकला नसता. कारण बिल गेट्सला त्याच्या विशेष स्थितिमुळे ज्या विशेष संधी उपलब्ध झाल्यास त्या कदाचित इतरांना झाल्या नसत्या.
मग आंबेडकर का यशस्वी झाले? असले अपवादात्मक उदाहरण देणारे मुर्ख सुद्धा तुम्हाला नक्कीच भेटले असतील. डॉ. आंबेडकर हे अपवाद आहेत. थोड्या फार प्रमाणात प्रत्येक ठिकाणी असं एखादे अपवादात्मक उदाहरण असते. पण अपवाद म्हणजे नियम नाही. डॉ. आंबेडकरांसारखे एखादे अपवादात्मक उदहारण देऊन शेकडो वर्ष जे विशेषाधिकार उपभोगले त्याला नाकारता येत नाही. जर मेहनत करुनच अनुसूचित जाती, जमातीतील सगळेच लोक आंबेडकर बनू शकले असते तर अनुसूचित जाती, जमातींना त्यांच्या हक्कांसाठी डॉ. आंबेडकरांना सवर्ण सनातनी वृत्तिशी आयुष्यभर लढा द्यावा लागला नसता. ज्या सवर्णांनी शेकडो वर्षे १०० टक्के आरक्षण घेतलं तेच अनुसूचित जाती, जमातींना आरक्षण द्यावे लागू नये म्हणून गेल्या सत्तर वर्षापासून अनेक षडयंत्र करत आलीत. म्हणूनच कदाचित सवर्णांना मिळालेल्या विशेष संधीचा कोणी उच्चार करु नये म्हणून या षड़यंत्री वृत्तीवर न बोलता सत्तर वर्षापासून आरक्षणाच्या नावाने बोंबा काही जण मारत असतील? जर सवर्णांना मेरिटचा एवढाच अहंकार असेल तर त्यांनी अनुसूचित जाती, जमातींना जसं गुलामीत ठेवलं तसेच किमान पाचशे वर्षे त्यांच्या गुलामीत राहून दाखवावे आणि मग नंतर मेरिटच्या बाता माराव्यात.
Watch "The Dark Secret of Bill Gates | Becoming the World's Richest Man | Dhruv Rathee" on YouTube
कोणत्याही टिप्पण्या नाहीत:
नवीन टिप्पण्या अनुमत नाहीत.